Kaminata di arkitektura den e parti históriko di Willemstad

Eksperensiá e siudat históriko riba bo mes, kanando den sentro di siudat ku e guia di arkitektura akí. Den dje lo bo haña un kaminata pa ost i unu pa wèst, tur dos kuminsando na Bahia di Santa Ana serka di e brùg di ponton Reina Emma. E kaminata pa parti ost lo laga bo pasa den e parti mas bieu di Willemstad, awendia yamá Punda, i den un parti chikí di e bario di Skaló. E ruta akí tin un largura di mas o ménos 2,75 kilometer. E kaminata pa parti wèst ta guia bo den e distrito di Otrobanda, na e otro banda di Bahia di Santa Ana. E ruta akí tin un largura di mas o ménos 3,25 kilometer.

Willemstad, un Siudat Patrimonio Mundial di UNESCO

E suidat históriko di Willemstad ta konsistí di kuater parti: Punda, Skalo i Pietermaai na e parti ost i Otrabanda ku ta keda na e parti wèst di Bahia Santa Anna. Esaki ta e kanal di awa profundo ku ta dividí Willemstad den dos mitar. Na añanan 90 mas o ménos, mitar di e edifisionan na Willemstad históriko a ser proklamá monumento pa gobièrnu di Kòrsou. Aproksimadamente 750 monumento den un struktura di siudat, ku no a kambia substansialmente den transkurso di tres siglo, originalmente hulandes pero ku durante su desaroyo a ser influenshá pa diferente otro kultura, ta hasi Willemstad un siudat úniko den Karibe. E singularidat akí tabata e konsiderashon prinsipal pa UNESCO ku a sòru pa nan pone ‘Willemstad Históriko riba e lista Suidat Patrimonio Mundial  (World Heritage List) na desèmber 1997.