Inougurashon di ‘Ruta Burubari’

Boneiru no ta solamente un paraiso bou di laman. Riba tera tambe tin hopi kos pa deskubrí. E grupo di kanadó Chantiwawa, un dje pianan di Fundashon Históriko Kultural Boneriano (FuHiKuBo), a habri sinku ruta nobo pa tantu hende lokal komo turista. Pa medio di e sinku ruta nobonan aki, i otronan ku lo sigui den kurso di otro aña, FuHiKuBo ke invitá tur hende pa eksperensiá Boneiru na un manera spesial, esta na pia.

E grupo di Chantiwawa a krea e rutanan aki bou di guia di Bòi Antoin. Ta rutanan ku ta pasa meimei di palu i matanan bunita, pero ta inkluí tin biá seru i terenonan habrí. Kada ruta tin nan propio karakter i ta konta un pida di e storia natural i kultural di Boneiru.

Bòi Antoin ta splika: “Nos laman ta mundialmente famá, pero nos naturalesa riba tera no ta ménos impreshonante. Ku e rutanan aki nos ta laga mira on bunita i bibu Boneiru ta, for di nos fosil i paranan te nos mata i paisahenan spesial.”

E rutanan nobo ta Ruta Burubari, Ruta Nene Shòrs, Ruta Angola, Ruta Onima, Ruta Angola i Ruta Colá. Kada un ku nan karakter i historia spesial.

E kaminatanan di Chantiwawa ta mas ku simplemente kana pa tene kurpa den bon kondishon físiko. Nan ta konektá naturalesa, kultura i historia ku otro, loke presisamente FuHiKuBo ta para p’e. FuHiKuBo pa añanan kaba ta hasi esfuerso pa salbaguardiá e identidat boneriano. Ku e inisiativa nobo aki pa kanadó, Chantiwawa literalmente ta pone herensia kultural i naturalesa den moveshon.

“Gustosamente nos ke inspirá hende pa no solamente kana, sino pa mira, skucha, hole i sinti. Pasobra esun ku deskubrí Boneiru na pia ta mira e isla aki realmente”, segun Bòi Antoin.

Fecha: Djasabra 15 di novèmber