E islanan karibense den Reino Hulandes ta formá pa un historia i influensia kultural kompartí. Den hopi aspekto e islanan ta parse otro mas ku nan ta diferensiá di otro.

Durante di e último siglonan a publiká hopi informashon tokante e herensia kompartí akí. For di e relatonan friu skirbí den siglo diesnuebe ku ta kontá for di e perspektiva kolonial, te na diferente programa di enseñansa moderno ku a desaroyá riba e islanan mes den e último añanan.

Stichting Monumentenzorg Curaçao a tuma e inisiativa pa desaroyá un sistema di búskeda pa promové interkambio di konosementu entre e islanan, i fasilitá e posibilidatnan pa haña informashon, material pa enseñansa i aktividat riba tereno di patrimonio hulandes karibense. E meta ta, pa huntu ku diferente partner riba tur seis isla, ofresé ​​un inventario mas kompleto posibel riba tereno di herensia den e sentido mas amplio di palabra.

Informashon

Bou di e rúbrika ‘Informashon’ por haña bèk publikashon, link pa base di dato spesífiko, website di instituto di herensia riba e islanan i mas. Por skohe e idioma di publikashon, tipo di publikashon, tema i e área/isla ku e informashon ta trata. Sea ta pa hasi investigashon, prepará un presentashon oral òf ke sa mas di e isla ku ta bai bishitá, aki por haña e informashon ku ta buska.

Edukashon

Na aña 2017, riba enkargo di Komishon Nashonal di Kòrsou pa UNESCO (Curaçao National Commission for UNESCO), a hasi un inventario di material i programa pa duna lès riba tereno di patrimonio arkitektóniko i arkeológiko ku tin na Kòrsou. Un di e rekomendashonnan di mas importante tabata pa krea un plataforma digital pa oumentá e fasilidat pa haña e materialnan akí. E parti akí di e website no solamente ta kompartí programa di lès eksistente. E ta duna tambe e posibilidat pa otro profeshonal di enseñansa di e diferente islanan kompartí e materialnan ku nan a desaroyá ku un grupo mas grandi di dosente. Di e manera akí, na nivel di e seis islanan e maestronan por sigui amplia riba otro su informashon i métodonan, pa haña e konosementu nesesario pa kompartí den klas.

Aktividat

Tur isla ta ofresé un variedat amplio di aktividat kultural i relashoná ku patrimonio. E aktividatnan akí por tin netamente un karakter informativo, manera un charla òf rekorido, pero nan por tin tambe un karakter festivo kaminda e enfoke ta riba e selebrashonnan ku tin nan rais ankrá den e herensia kultural di e islanan.

Sosten amplio

Tur organisashon di patrimonio i profeshonal riba tereno di edukashon i di herensia riba e islanan por duna nan aporte na komplementá i balidá e informashon. Pa duna un aporte, komo kolaboradó, pa yuda kompletá e informashon, por manda un e-mail pa info@dutchcaribbeanheritage.org. E plataforma Herens/cia | Erfgoed | Heritage ta posibel danki na entre otro Cultureelfonds Caribisch Gebied, Mondriaan Fonds i UNESCO Participation programme. E plataforma Herens/cia | Erfgoed | Heritage ta posibel danki na entre otro Cultuurfonds Caribisch Gebied, Mondriaan Fonds i UNESCO Participation programme