Stichting Monumentenzorg Curaçao a tuma e inisiativa pa krea e plataforma Herens/cia | Erfgoed | Heritage ku e konvikshon ku informashon tokante patrimonio di e islanan CAS i BES mester ta aksesibel i fásil pa haña. E fundashon mes ta finansiá maneho di e proyekto i e gastunan general.

Sin Cultuurfonds Caribisch Gebied, e proyekto aki lo no tabata posibel. E fondo akí a patrosiná gran parti e promé fase di e proyekto, i asina a pone e fundeshi di manera ku por sigui elaborá i komplementá informashon.

Mondriaan Fonds ta hasi posibel pa por sigui amplia, komplementá i pone e website disponibel na papiamentu/o i ingles, i pa e ta kla pa promové serka un públiko amplio.

UNESCO, pa medio di su Participation Programme — un fondo ku ta sostené proyektonan kultural i edukativo rònt mundu — a kontribuí na realisashon di e proyekto aki. Nan sosten ta hasi posibel pa nos yena e wèpsait ku informashon i rekursonan edukativo tokante e herensia di Karibe Hulandes, loke ta permití nos sigui desaroyá nos trabou den edukashon kultural i partisipashon den komunidat segun ku e proyekto ta krese.

Na aña 2023, Vertegenwoordiging van Nederland (Representashon di Hulanda) in Aruba, Curaçao & St. Maarten a organisá un Prinsjesdag Challenge pa e alumnonan di skol sekundario. E studiantenan di Albert Schweitzer College a gana e reto akí ora nan a desaroyá un plan ekológikamente responsabel pa e tereno di Refineria. Komo parti di e premio, e Representashon di Hulanda a pone disponibel, un donashon destiná pa un bon kousa. E studiantenan a skohe Stichting Monumentenzorg Curaçao, ku a usa e sèn pa desaroyá e website dutchcaribbeanheritage.org, ku e meta pa hasi material edukativo tokante patrimonio aksesibel.